چلاس(بیورورپورٹ)دیامر بھاشا ڈیم دی گیم چینجر پراجیکٹ اینڈ دی رول آف ایس سی او کے عنوان سے قراقرم یونیورسٹی کیمپس چلاس میں گلگت بلتستان یوتھ اسمبلی اور وال آف ہوپ کے زیر ایک اہم سیمینار کا انعقاد کیا گیا۔سیمینار میںدیامر بھر سے طلبا و طالبات اور مختلف سیاسی و سماجی حلقوں نے شرکت کی۔سیمینار کے مہمان خصوصی سیکٹر کمانڈر ایس سی او کرنل عمران منصور تھے۔ سیمینار میں سابق وزیر اطلاعات عنایت اللہ خان شمالی,سابق ترجمان حکومت فیض اللہ فراق,ڈی سی دیامر سعد بن اسد,ایس پی دیامر رفعت اللہ اور ڈاریکٹر چلاس کیمپس شاہ نواز نے خصوصی شرکت کی۔سمینار میں دیامر بھاشہ ڈیم کی افادیت اور گلگت بلتستان میں ایس سی او کی کارکردگی پر مقررین نے روشنی ڈالی۔سمینار سے خطاب کرتے ہوئے مہمان خصوصی سیکٹر کمانڈر ایس سی او کرنل عمران منصور نے کہا کہ کرونا وائرس کے دوران تعلیمی شعبے کو متاثر ہونے سے بچانے کیلئے ایس سی او نے گلگت بلتستان کے انٹرنیٹ سے جڑے لوگوں کی آسانی کیلئے دس ملین سے زائد کا سبسڈی دیا جس سے کوڈ کے دوران انٹرنیٹ پر تعلیم حاصل کرنے والے اور آن لائن کاروباری شعبے کے لوگوں کو فائدہ ہوا۔

ایس سی او نے گلگت بلتستان کے مختلف تعلیمی اداروں میں فری انٹرنیٹ سروس مہیا کی ہیں جس سے طلبہ و طالبات مستفید ہورہے ہیں۔انہوں نے کہا کہ حکومت کیساتھ مل کر چلاس میں بہت جلد سوفٹ ویئر ٹیکنالوجی پارک کا قیام عمل میں لائیں گے,گلگت بلتستان کے نوجوانوں کو آئی ٹی کے شعبے میں ہنر مند بنائیں گے اور جدید تعلیم سے آراستہ کریں گے۔انہوں نے کہا کہ ایس سی او نے دیامر کے حدود میں 80 فیصد ایس کام سروس مکمل کی ہے تھلچی سے لیکر دیامر بھاشہ ڈیم سائڈ تک درجنوں ٹاورز لگ چکے ہیں اور انٹرنیٹ سروس مہیا کی جاچکی ہیں۔ایس سی او بہت جلد چلاس کے اندر فائبر ٹو ہوم پراجیکٹ کو فنگشنل کرے گا جس سے مقامی لوگوں کو انٹرنیٹ ,ٹی وی اور دیگر سہولیات کم خرچ پر میسر ہونگی۔سمینار سے سابق ترجمان حکومت فیض اللہ فراق نے کہا کہ دیامر بھاشہ ڈیم ملکی ترقی میں ریڑھ کی ہڈی کی حثیت رکھتا ہے یہاں کے نوجوان آنے والے دور کیلئے خود کو ابھی سے تیار کرلیں دیامر کا مستقبل شاندار ہے ,نوجوان اپنی صلاحتیں تعلیم پر مرکوز رکھیں۔انہوں نے کہا کہ دیامر کے لوگ اجتماعی طور پر خود کو مستقبل کے چیلنجیز سے نمٹنے کیلئے تیار رہیں,دیامر بدل رہا ہے عوام تعلیم کیساتھ ساتھ تربیت کی طرف بھی توجہ دیں اپنے بچوں کی تربیت سے بہتر معاشرہ تشکیل پاسکتا ہے۔انہوں نے کہا کہ دیامر بھاشہ ڈیم کے خلاف ہونے والی سازشوں کو گلگت بلتستان کے نوجوان ناکام بنا رہے ہیں۔ہم پاکستانی بیانیے کی جگہ جگہ پرچار کریں گے۔انہوں نے مزید کہا کہ دیامر کے دور دراز علاقوں تک ایس سی او کی سروس کی فراہمی نیک شگون ہے۔سمینار سے عنایت اللہ خان شمالی نے خطاب کرتے ہوئے کہا کہ دیامر کے نوجوان تعلیم کو اپنا اڑھنا اور بچھونا بنائیں اور قلم سے دوسرے اقوام کا مقابلہ کریں۔سمینار سے ڈاریکٹر چلاس کیمپس شاہ نواز,پرنسپل کیڈٹ کالج چلاس فضل حکیم اور یوتھ اسمبلی کے اراکین نے بھی خطاب کیا۔